A luz do atardecer ilumina cada tarde as cruces nos cantís orientadas ao mar en recordo de mortos e desaparecidos. Nese momento ofrécense xuntos os dous elementos, atardeceres e traxedias, que rebautizaron o latino Finisterrae para convertelo en Costa da Morte.
Na actualidade segue sendo un dos puntos estratéxicos máis transitados dos roteiros marítimos intercontinentais e un dos máis perigosos para a navegación. O rexistro cartográfico de naufraxios e salvamentos énchese de cruces que representan máis dun centenar e medio de embarcacións afundidas no último século, pero pérdese a conta dos sustos cotiáns na memoria colectiva dun pobo mariñeiro, por outra banda alegre e vital.
