Esta ruta permite combinar tramos de litoral costeiro con zonas interiores polo que o contraste de flora e fauna é importante dentro do espazo protexido da Costa de Dexo e Serantes (Monumento Natural).
No tramo costeiro domina a matogueira almofadada ou especies adaptadas a un litoral caracterizado polas acometidas do vento e as escarpas rochosas; destacando endemismos galaicos ou noroccidentais ibéricos coma a Armeria pubigera ou especies representativas coma o toxo (Ulex europaeus). Caracterízanse polos cantís, illotes coma A Marola ou furnas mariñas (formacións xeolóxicas formadas pola erosión conxunta do vento e a auga).
Cara o interior xa dominan as zonas boscosas.
O punto de partida é a igrexa de Dexo ou no Porto de Dexo. No transcurso da ruta atoparemos o muíño de Dexo, a caliña de Dexo (xunto ao porto) noutra época importante zona pesqueira, ou Punta da Roza na que atopamos unha furna (A furna do Ladrón) costeira. En xeral, afíncase nunha zona de especial beleza natural, con gran valor paisaxístico e ornitolóxico.
